1 Ex inherma̱n, relic chi ya̱l nacuaj nak eb laj Israel teꞌcolekꞌ. Aꞌan li nintzꞌa̱ma junelic chiru li Dios.
2 La̱in ninnau nak nequeꞌx-oxlokꞌi li Dios, abanan toj ma̱jiꞌ nequeꞌxnau chanru xpa̱banquil li Dios.
3 Ut incꞌaꞌ nequeꞌxnau chanru nak nati̱coꞌ li kachꞌo̱l chiru li Dios. Queꞌxyal xti̱cobresinquil xchꞌo̱leb chiru li Dios yal xjuneseb rib. Ut incꞌaꞌ queꞌraj xba̱nunquil li yebil xban li Dios.
4 Nak quicꞌulun li Cristo saꞌ ruchichꞌochꞌ, quirakeꞌ xcꞌanjel li chakꞌrab li quiqꞌueheꞌ re laj Moisés xban li Dios. Ut chixjunileb li teꞌpa̱ba̱nk re li Cristo teꞌti̱cokꞌ xchꞌo̱leb chiru li Dios.
5 Laj Moisés quitzꞌi̱bac chirix li chakꞌrab ut quixye: Cui ani tixpa̱b li chakꞌrab ut tixba̱nu chi tzꞌakal li cꞌaꞌru naxye, aꞌan ti̱c xchꞌo̱l chiru li Dios ut ta̱cua̱nk xyuꞌam.
6 Anakcuan la̱o ti̱cobresinbil chic li kachꞌo̱l chiru li Dios riqꞌuin xpa̱banquil li Cristo. Saꞌ li Santil Hu naxye chi joꞌcaꞌin: Incꞌaꞌ ta̱ye saꞌ a̱chꞌo̱l ¿ani ta̱takekꞌ saꞌ choxa re xtzꞌa̱manquil chiru li Cristo nak ta̱cubek chak saꞌ ruchichꞌochꞌ? Ma̱ye chi joꞌcan xban nak ac cꞌulujenak saꞌ ruchichꞌochꞌ.
7 Chi moco ta̱ye ¿ani ta̱cubek cuanqueb cuiꞌ li camenak re xcuaclesinquil li Cristo saꞌ xya̱nkeb li camenak? Incꞌaꞌ naru ta̱ye chi joꞌcan xban nak ac cuaclijenak chi yoꞌyo.
8 Joꞌcaꞌin naxye li Santil Hu: Ac nequenau lix ya̱lal ut nequeserakꞌi resilal li quixye li Dios ut cuan ajcuiꞌ saꞌ le̱ chꞌo̱l. Lix ya̱lal aꞌan nak tento takapa̱b li Cristo ut aꞌan li pa̱ba̱l li nakachꞌolob xya̱lal che̱ru.
9 Cui riqꞌuin xtzꞌu̱mal a̱cue ta̱chꞌolob xya̱lal nak li Jesús aꞌan li Cristo li Ralal li Dios, ut cui ta̱pa̱b chi anchal a̱chꞌo̱l nak li Dios quicuaclesin cuiꞌchic re chi yoꞌyo saꞌ xya̱nkeb li camenak, tatcolekꞌ.
10 Li ani naxpa̱b li Cristo chi anchal xchꞌo̱l ut naxchꞌolob xya̱lal riqꞌuin xtzꞌu̱mal re, aꞌan nati̱coꞌ xchꞌo̱l chiru li Dios ut ta̱colekꞌ.
11 Joꞌcaꞌin tzꞌi̱banbil saꞌ li Santil Hu:Li ani ta̱pa̱ba̱nk re aꞌan, incꞌaꞌ ta̱rahokꞌ xchꞌo̱l mokon xban nak tixcꞌul li cꞌaꞌru yechiꞌinbil re xban li Dios. (Isa. 28:16)
12 Chiru li Dios juntakꞌe̱teb laj judío riqꞌuin li ma̱cuaꞌeb aj judío xban nak jun ajcuiꞌ li Ka̱cuaꞌ saꞌ xbe̱neb chixjunileb. Ut nim li ruxta̱n saꞌ xbe̱neb chixjunileb li nequeꞌya̱ban re lix cꞌabaꞌ.
13 Joꞌcaꞌin tzꞌi̱banbil saꞌ li Santil Hu: Yalak ani ta̱ya̱ba̱nk re xcꞌabaꞌ li Ka̱cuaꞌ, aꞌan ta̱colekꞌ.
14 Abanan ¿chanru nak teꞌxya̱ba xcꞌabaꞌ li Ka̱cuaꞌ cui toj ma̱jiꞌ nequeꞌxpa̱b? Ut, ¿chanru nak teꞌxpa̱b cui toj ma̱jiꞌ nequeꞌrabi resil? Ut, ¿chanru nak teꞌrabi resil li Ka̱cuaꞌ cui ma̱ ani nachꞌoloban xya̱lal chiruheb?
15 Ut ¿chanru nak ta̱chꞌoloba̱k chak xya̱lal chiruheb cui ma̱ ani taklanbil xban li Ka̱cuaꞌ? Joꞌcaꞌin tzꞌi̱banbil saꞌ li Santil Hu:Cꞌajoꞌ xlokꞌal eb li nequeꞌxic yalak bar chixyebal resil li colba-ib, li naqꞌuehoc tuktu̱quil usilal. (Isa. 52:7)
16 Aban moco chixjunileb ta queꞌpa̱ban re li resil li colba-ib. Laj Isaías quixye:At Ka̱cuaꞌ, moco qꞌuiheb ta li xeꞌpa̱ban li resil li colba-ib li nakajultica chiruheb. (Isa. 53:1)
17 Joꞌcan nak li pa̱ba̱l natauman riqꞌuin rabinquil resil li Jesucristo.
18 Ut la̱in ninye, ¿ma ya̱l ta biꞌ nak eb laj Israel incꞌaꞌ queꞌrabi chak resil junxil? Queꞌrabi. ¿Cꞌaꞌut nak incꞌaꞌ? Xban nak tzꞌi̱banbil chi joꞌcaꞌin saꞌ li Santil Hu:Saꞌ chixjunil li ruchichꞌochꞌ qui-el resil ut jun sut rubel choxa quicuulac li ra̱tineb. (Sal. 19:4)
19 Ut ninye ajcuiꞌ, ¿ma incꞌaꞌ ta biꞌ queꞌxtau xya̱lal aꞌin eb laj Israel? Queꞌxtau raj aban incꞌaꞌ queꞌraj. Laj Moisés quixye reheb li cꞌaꞌru quixye li Dios. Quixye chi joꞌcaꞌin:Saꞌ incꞌabaꞌ la̱in te̱cakali jun li tenamit ma̱cuaꞌeb intenamit. Ut tinchikꞌ e̱joskꞌil saꞌ xbe̱neb aꞌan, li incꞌaꞌ nequeꞌxnau xya̱lal, xban nak eb aꞌan li teꞌcuuxta̱na ru. (Deut. 32:21)
20 Laj Isaías cau xchꞌo̱l chixyebal li cꞌaꞌru quixye li Dios nak quixye:Aꞌ chic li incꞌaꞌ yo̱queb chinsicꞌbal, aꞌaneb chic li xeꞌtaꞌoc cue. Quincꞌutbesi cuib chiruheb li incꞌaꞌ yo̱queb chinsicꞌbal. (Isa. 65:1)Aꞌan li quixye li Dios chirixeb li ma̱cuaꞌeb aj judío.
21 Ut chirixeb laj judío li Dios quixye:Junelic yo̱quin chixbokbaleb laj Israel re nak teꞌcha̱lk cuiqꞌuin. Abanan eb aꞌan incꞌaꞌ nequeꞌabin chicuu. Nequeꞌxkꞌet ban li cua̱tin. (Isa. 65:2)