1 Lix cuanquil laj Salomón, li ralal laj David, quixakaba̱c saꞌ xnaꞌaj ut kꞌaxal cuiꞌchic quiniman xucuanquil xban nak li Ka̱cuaꞌ lix Dios cuan riqꞌuin.
2 Laj Salomón quixtakla xchꞌutubanquileb chixjunileb laj Israel. Queꞌxchꞌutub ribeb li nequeꞌtaklan saꞌ xbe̱neb li junju̱nk chꞌu̱tal chi soldado, ut eb laj rakol a̱tin, joꞌ eb ajcuiꞌ li nequeꞌtaklan saꞌ xbe̱neb laj Israel, ut eb li nequeꞌjolomin reheb li junju̱nk cabal.
3 Ut laj Salomón rochbeneb chixjunileb li queꞌxchꞌutub ribeb queꞌco̱eb Gabaón saꞌ li naꞌajej li najt xteram xban nak aran cuan lix tabernáculo li Dios li quixyi̱b saꞌ li chaki chꞌochꞌ laj Moisés laj cꞌanjel chiru li Dios.
4 Abanan lix Lokꞌlaj Ca̱x li Ka̱cuaꞌ cuan Jerusalén saꞌ li muheba̱l li quixyi̱b laj David nak quixcꞌam chak li Lokꞌlaj Ca̱x toj Quiriat-jearim.
5 Ut li artal yi̱banbil riqꞌuin bronce cuan aran Gabaón chiru lix tabernáculo li Ka̱cuaꞌ. Aꞌan li artal li quixyi̱b laj Bezaleel, li ralal laj Uri. Laj Uri, aꞌan li ralal laj Hur. Aran co̱ laj Salomón rochbeneb li tenamit chixpatzꞌbal chiru li Dios cꞌaꞌru us tixba̱nu.
6 Laj Salomón co̱ chiru li artal yi̱banbil riqꞌuin bronce, li cuan chiru lix tabernáculo li Ka̱cuaꞌ. Ut aran quixmayeja jun mil li xul saꞌ li artal.
7 Saꞌ li kꞌojyi̱n aꞌan li Dios quixcꞌutbesi rib chiru laj Salomón ut quixye re: —Tzꞌa̱ma li cꞌaꞌru ta̱cuaj ut la̱in tinqꞌue a̱cue, chan.
8 Ut laj Salomón quixye re li Dios: —Junelic cacuuxta̱na ru laj David lin yucuaꞌ. Ut la̱at catxakaban cue chokꞌ rey chokꞌ re̱kaj.
9 Joꞌcan ut, at Ka̱cuaꞌ, at inDios, chaba̱nu joꞌ cayechiꞌi re laj David inyucuaꞌ. La̱at catxakaban cue chokꞌ rey saꞌ xbe̱n jun tenamit kꞌaxal nim. Chanchaneb li poks xban nak kꞌaxal nabaleb.
10 Nintzꞌa̱ma cha̱cuu nak ta̱qꞌue taxak innaꞌleb re nak tinnau takla̱nc saꞌ xbe̱neb. ¿Ani ta biꞌ ta̱ru̱k ta̱takla̱nk saꞌ xbe̱neb la̱ tenamit xban nak kꞌaxal nabaleb? chan laj Salomón.
11 Li Ka̱cuaꞌ quirabi lix tij laj Salomón ut quixye re: —Us li xatzꞌa̱ma chicuu. La̱at incꞌaꞌ xatzꞌa̱ma nak tinnajtobresi rok la̱ yuꞌam, chi moco xatzꞌa̱ma la̱ biomal, chi moco la̱ lokꞌal. Chi moco xatzꞌa̱ma chicuu nak teꞌca̱mk li xicꞌ nequeꞌiloc a̱cue. Xatzꞌa̱ma ban chicuu nak tinqꞌue a̱naꞌleb re nak ta̱nau takla̱nc saꞌ xya̱lal saꞌ xbe̱neb lin tenamit li xatinxakab cuiꞌ chokꞌ rey.
12 La̱ naꞌleb li xatzꞌa̱ma tinqꞌue a̱cue. Ut tinqꞌue ajcuiꞌ a̱biomal ut tinqꞌue a̱lokꞌal. Ma̱ jun rey ta̱cua̱nk joꞌ la̱at, chi moco junxil, chi moco mokon, chan li Ka̱cuaꞌ.
13 Tojoꞌnak laj Salomón qui-el Gabaón saꞌ li naꞌajej li najt xteram li cuan cuiꞌ lix tabernáculo li Ka̱cuaꞌ ut co̱ Jerusalén. Ut aran quitaklan saꞌ xbe̱neb laj Israel.
14 Laj Salomón quixchꞌutubeb lix carruajes ut eb lix soldados li nequeꞌxic chirix cacua̱y. Cuanqueb jun mil riqꞌuin ca̱hib ciento (1,400) lix carruajes ut cablaju mil (12,000) li cui̱nk li nequeꞌxic chirix cacua̱y. Cuan li quixcꞌameb saꞌ li tenamit li quixyi̱b re xxocbaleb lix carruaje ut cuan queꞌcana Jerusalén cuan cuiꞌ li rey.
15 Nak cuan chokꞌ rey laj Salomón nabal li plata ut li oro quixchꞌutub aran Jerusalén. Chanchan chic xqꞌuial li pec. Joꞌcan ajcuiꞌ li cha̱bil cheꞌ chacalteꞌ. Kꞌaxal cuiꞌchic nabal cuan. Chanchan li cheꞌ higo li cuan saꞌ li naꞌajej Sefela.
16 Li jun chꞌu̱taleb lix mo̱s laj Salomón nequeꞌxic aran Egipto chixlokꞌbal chak li cacua̱y ut li cha̱bil tꞌicr chokꞌ re li rey Salomón.
17 Nequeꞌchal nequeꞌxic aran Egipto chi lokꞌoc. Nequeꞌxlokꞌ li carruaje aran Egipto chi cuakib ciento (600) chi tumin plata. Ut li cacua̱y nequeꞌxlokꞌ chi jun ciento riqꞌuin mero ciento (150). Joꞌcan nequeꞌxlokꞌ cuiꞌ eb aꞌan. Ut eb lix reyeb laj heteo ut eb li rey re Siria nequeꞌxlokꞌ li cacua̱y ut li carruaje riqꞌuineb aꞌan.