1 Quicuan jun li cui̱nk aj Job xcꞌabaꞌ saꞌ li naꞌajej Uz. Li cui̱nk aꞌin tzꞌakal re ru lix yuꞌam ut ti̱c xchꞌo̱l. Naxxucua ru li Dios ut incꞌaꞌ naxba̱nu li ma̱usilal.
2 Queꞌcuan cuukub ralal ut oxib xrabin.
3 Laj Job kꞌaxal nabal cꞌaꞌru re cuan. Cuukub mil lix carner ut oxib mil lix camello, o̱b ciento sumal lix bo̱yx ut o̱b ciento lix bu̱r. Kꞌaxal nabaleb lix mo̱s. Laj Job, aꞌan li kꞌaxal biom saꞌ chixjunil li naꞌajej li cuan saꞌ li oriente.
4 Eb li ralal nequeꞌxba̱nu xninkꞌeheb rajlal saꞌ li rochocheb chi xjunju̱nkaleb nak nequeꞌxba̱nu xchihabeb. Ut nequeꞌxtakla xbokbaleb li ranab oxib re teꞌcuaꞌak rochbeneb.
5 Nak nequeꞌrakeꞌ chi ninkꞌei̱c, laj Job naxqꞌue lix cꞌatbil mayej re xsantobresinquileb li ralal xcꞌajol. Nacuacli toj ekꞌela ut naxqꞌue lix mayej aꞌ yal jarub li ralal xcꞌajol cuan. —Ma̱re eb li cualal incꞌajol queꞌma̱cob ut queꞌxmajecua li Dios saꞌ xchꞌo̱leb, chan laj Job. Ut rajlal naxba̱nu chi joꞌcan.
6 Quicuulac xkꞌehil nak queꞌxchꞌutub rib chiru li Dios eb li ángel. Ut saꞌ xya̱nkeb aꞌan quicuulac laj tza.
7 Ut li Ka̱cuaꞌ Dios quixye re laj tza: —¿Bar xatchal chak? chan re. Ut laj tza quixye re li Dios: —Yo̱quin chak chixsutinquil li ruchichꞌochꞌ. Ut yo̱quin chixbeninquil cuib yalak bar, chan.
8 Ut li Ka̱cuaꞌ Dios quixye re laj tza: —¿Ma incꞌaꞌ nacacuil laj Job laj cꞌanjel chicuu? Ma̱ ani chic junak cui̱nk joꞌ aꞌan saꞌ ruchichꞌochꞌ. Aꞌan tzꞌakal re ru lix yuꞌam ut ti̱c xchꞌo̱l. Aꞌan naxxucua cuu ut incꞌaꞌ naxba̱nu ma̱usilal, chan.
9 Ut laj tza quichakꞌoc ut quixye re li Ka̱cuaꞌ Dios: —¿Ma ya̱l naxxucua ta biꞌ a̱cuu yal chi joꞌcan? ¿Ma ma̱cuaꞌ ta biꞌ xban li cꞌaꞌru cuan re nak naxxucua a̱cuu?
10 ¿Ma ma̱cuaꞌ ta biꞌ la̱at yo̱cat chi coloc rix lix jun cablal ut chixjunil li cꞌaꞌru cuan re? Ut la̱at ajcuiꞌ yo̱cat chi osobtesi̱nc re riqꞌuin chixjunil li cꞌaꞌru naxba̱nu. Joꞌcan nak yo̱ chi qꞌuia̱nc li cꞌaꞌru re saꞌ ruchichꞌochꞌ.
11 Cui la̱at ta̱cuisi chixjunil li cꞌaꞌru cuan re chiru, aran ta̱cuil ma incꞌaꞌ na tatxmajecua saꞌ xnakꞌ a̱cuu, chan laj tza.
12 Li Ka̱cuaꞌ quixye re laj tza: —Us. Ba̱nu chixjunil li cꞌaꞌru ta̱cuaj riqꞌuin li cꞌaꞌru cuan re. Abanan laj Job ma̱cꞌaꞌ ta̱ba̱nu re, chan. Ut chirix aꞌan qui-el laj tza riqꞌuin li Ka̱cuaꞌ.
13 Saꞌ jun li cutan eb li ralal ut eb lix rabin laj Job yo̱queb chi cuaꞌac ut yo̱queb chi ucꞌac vino saꞌ rochoch li xbe̱n alalbej.
14 Saꞌ li ho̱nal aꞌan quicuulac jun li takl riqꞌuin laj Job ut quixye re: —Eb la̱ bo̱yx yo̱queb chi picꞌoc chꞌochꞌ riqꞌuin arado ut eb li bu̱r yo̱queb chi cuaꞌac nachꞌ riqꞌuineb.
15 Ma̱cꞌaꞌ saꞌ kachꞌo̱l nak queꞌcuulac eb laj sabeo ut queꞌrelkꞌa li bo̱yx ut eb li bu̱r. Ut xeꞌxcamsi chi chꞌi̱chꞌ eb la̱ mo̱s. La̱in xinchal chixyebal resil a̱cue xban nak caꞌaj chic la̱in xincoleꞌ, chan.
16 Toj yo̱ ajcuiꞌ chi a̱tinac li cui̱nk aꞌan nak quicuulac jun chic li mo̱s. Quixye: —Xmok li ca̱k ut xcamsiheb la̱ carner ut xcamsiheb ajcuiꞌ laj ilol reheb. Caꞌaj chic la̱in xincoleꞌ. Joꞌcan nak xinchal chixyebal a̱cue, chan.
17 Toj yo̱ ajcuiꞌ chi a̱tinac li cui̱nk aꞌan nak quicuulac jun chic li mo̱s. Quixye re laj Job: —Xeꞌcuulac oxib chꞌu̱tal laj Caldea chi ma̱cꞌaꞌ saꞌ kachꞌo̱l. Xeꞌrelkꞌaheb la̱ camello ut xeꞌxcamsiheb chi chꞌi̱chꞌ la̱ mo̱s. La̱in xinchal chixyebal resil a̱cue xban nak caꞌaj chic la̱in xincoleꞌ, chan.
18 Toj ma̱jiꞌ ajcuiꞌ narakeꞌ chi a̱tinac li cui̱nk aꞌan nak quicuulac jun chic li mo̱s ut quixye re laj Job: —Eb la̱ cualal ut eb la̱ rabin yo̱queb chi cuaꞌac ut chi ucꞌac vino saꞌ rochoch li xbe̱n a̱cualal.
19 Saꞌ junpa̱t xchal chak jun li cacuil ikꞌ saꞌ li chaki chꞌochꞌ. Ut quixsacꞌ rib saꞌ xca̱ pacꞌalil li cab ut quitꞌaneꞌ li cab saꞌ xbe̱neb la̱ cualal a̱cꞌajol. Ut xeꞌcam chixjunileb. Caꞌaj chic la̱in xincoleꞌ ut xinchal chixyebal resil a̱cue, chan.
20 Nak quirabi aꞌan, laj Job quicuacli ut quixpej li rakꞌ ut quixbes li rismal retalil lix rahil xchꞌo̱l ut quixcuikꞌib rib saꞌ chꞌochꞌ ut quixlokꞌoni li Dios.
21 Ut quixye: —Ma̱cꞌaꞌ cuan cue saꞌ li ruchichꞌochꞌ aꞌin nak quinyoꞌla ut ma̱cꞌaꞌ ajcuiꞌ tincꞌam chicuix nak tinca̱mk. Li Ka̱cuaꞌ xqꞌuehoc cue chixjunil li cꞌaꞌru cuan cue ut aꞌan x-isin re chicuu. Lokꞌoninbil taxak xcꞌabaꞌ li Ka̱cuaꞌ, chan.
22 Riqꞌuin chixjunil li raylal li quixcꞌul laj Job, incꞌaꞌ quima̱cob chiru li Dios, chi moco quixqꞌue saꞌ xbe̱n li Dios li cꞌaꞌru quicꞌulman.