1 Saꞌ eb li cutan nak cuanqueb laj rakol a̱tin chi takla̱nc saꞌ xbe̱neb li tenamit Israel, quicuan jun li cueꞌej saꞌ chixjunil li naꞌajej aꞌan. Ut cuan jun li cui̱nk aj Belén xcue̱nt Judá co̱ chi cua̱nc saꞌ li tenamit Moab rochben li rixakil. Ut xcaꞌbichaleb li ralal quixcꞌam chirix.
2 Li cui̱nk aꞌan aj Elimelec xcꞌabaꞌ ut li rixakil, aꞌan lix Noemí. Jun li ralal aj Mahlón xcꞌabaꞌ ut li jun chic aj Quelión. Aꞌaneb laj efrateo li cuanqueb aran Belén xcue̱nt Judá. Queꞌcuulac saꞌ li naꞌajej Moab ut aran queꞌcana.
3 Ac cuanqueb chic aran, nak quicam laj Elimelec xbe̱lom lix Noemí. Ut lix Noemí quicana xjunes rochbeneb li cocꞌal cuib.
4 Mokon chic queꞌsumla li cuib chi al. Ut li cuib chi ixk li queꞌsumla cuiꞌ, aꞌaneb aj Moab. Li jun xOrfa xcꞌabaꞌ ut li jun chic xRut xcꞌabaꞌ. Laje̱b chihab na queꞌcuan aran.
5 Ut queꞌcam ajcuiꞌ laj Mahlón ut laj Quelión. Ut lix Noemí quicana xjunes chi ma̱cꞌaꞌ chic xbe̱lom ut chi ma̱cꞌaꞌ chic lix yum cuib.
6 Saꞌ jun li cutan lix Noemí quirabi resil aran Moab nak li Ka̱cuaꞌ quirosobtesi cuiꞌchic lix tenamit ut cuanqueb chic xcua aran Judá. Joꞌcan nak lix Noemí quixcauresi rib chi e̱lc saꞌ li naꞌajej cuan cuiꞌ re ta̱sukꞌi̱k saꞌ lix tenamit.
7 Queꞌel Moab lix Noemí rochbeneb li ralib ut yo̱queb chi xic saꞌ li tenamit Judá.
8 Ut lix Noemí quixye reheb li ralib: —Ayukex che̱cabichalex. Sukꞌinkex saꞌ rochoch le̱ naꞌ. Ut aꞌ taxak li Ka̱cuaꞌ chi-ilok xtokꞌoba̱l e̱ru la̱ex joꞌ xeba̱nu nak quexcuan riqꞌuineb lin yum ut joꞌ ajcuiꞌ xeba̱nu cuiqꞌuin la̱in.
9 Ut aꞌ taxak li Dios chiqꞌuehok e̱re nak texsumla̱k cuiꞌchic ut chexcua̱nk taxak chi sa saꞌ e̱chꞌo̱l saꞌ le̱ rochoch, chan lix Noemí reheb. Ut quixchakꞌrabiheb ut quirutzꞌ ruheb. Ut eb li alibej queꞌoc chi ya̱bac.
10 Ut eb aꞌan queꞌxye: —La̱o incꞌaꞌ tosukꞌi̱k. Toxic ban cha̱cuix saꞌ la̱ tenamit, chanqueb.
11 Abanan lix Noemí quixpuersi ruheb ut quixye reheb: —Ex incoꞌ, sukꞌinkex. ¿Cꞌaꞌut nak te̱raj xic chicuix? ¿Ma toj teꞌcua̱nk ta biꞌ chic incocꞌal la̱in re texsumla̱k cuiꞌchic riqꞌuineb?
12 Sukꞌinkex, ex incoꞌ. La̱in ac ti̱xin chic re ta̱cua̱nk inbe̱lom. Ut usta toj naru ninsumla chiru li cutan aꞌin, ut cui ta teꞌcua̱nk incocꞌal,
13 ¿ma ta̱ru̱k ta biꞌ toj te̱roybeni nak teꞌcui̱nkilokꞌ? ¿Ma toj texcana̱k chi joꞌcan chi incꞌaꞌ texsumla̱k roybeninquil eb aꞌan? Incꞌaꞌ, ex incoꞌ. Ma̱ jokꞌe ta̱ru̱k. Kꞌaxal nim li raylal xqꞌue saꞌ inbe̱n li Ka̱cuaꞌ. Ut kꞌaxal cuiꞌchic ta̱rahokꞌ saꞌ inchꞌo̱l chirilbal nak yo̱kex chixcꞌulbal li raylal la̱ex inban la̱in, chan.
14 Ut eb li ralib queꞌoc cuiꞌchic chi ya̱bac chi cau. Ut lix Orfa quirutzꞌ ru lix Noemí ut quixchakꞌrabi ut quisukꞌi. Abanan lix Rut quicana rochben.
15 Ut lix Noemí quixye re lix Rut: —La̱ cuech alibejil xsukꞌi saꞌ lix tenamit. Xsukꞌi riqꞌuineb lix dios. Ayu chirix aꞌan, chan lix Noemí.
16 Abanan lix Rut quichakꞌoc ut quixye re: —Ma̱ye cue chi joꞌcan. La̱in incꞌaꞌ tatincanab. Bar tatxic la̱at, aran ajcuiꞌ tinxic la̱in. Bar tatcua̱nk la̱at, aran ajcuiꞌ tincua̱nk la̱in. La̱ tenamit, aꞌanak ajcuiꞌ lin tenamit la̱in. Ut la̱ Dios, aꞌanak ajcuiꞌ lin Dios la̱in.
17 Bar tatca̱mk la̱at, aran ajcuiꞌ tinca̱mk la̱in ut aran ajcuiꞌ tinmukekꞌ. Joꞌcan taxak chixba̱nu cue li Ka̱cuaꞌ ut joꞌcan taxak chixqꞌue cue nak caꞌaj cuiꞌ li ca̱mc ta̱jachok ke nak takacanab kib, chan lix Rut.
18 Ut nak quixqꞌue retal lix Noemí nak kꞌaxal ta̱raj xic chirix, ma̱cꞌaꞌ chic quixye.
19 Queꞌco̱eb chixcabichaleb toj queꞌcuulac Belén. Nak queꞌoc saꞌ li tenamit, chixjunileb queꞌsach xchꞌo̱l chi rilbal ut queꞌoc chi a̱tinac chi ribileb rib ut queꞌxye: —¿Ma aꞌan ta cuiꞌ lix Noemí? chanqueb.
20 Ut lix Noemí quixye reheb: —Me̱ye chic xNoemí cue; xMara chic te̱ye cue xban nak li nimajcual Dios xqꞌue jun nimla raylal saꞌ inbe̱n.[*]
21 Nak xin-el arin, numtajenak xsaylal saꞌ inchꞌo̱l. Aꞌut nak xinsukꞌi chak, ma̱cꞌaꞌ chic cuan cue xban nak joꞌcan quiraj li Dios. ¿Cꞌaꞌut nak te̱ye Noemí cue? Li Ka̱cuaꞌ xqꞌue jun raylal saꞌ inbe̱n. Li nimajcual Dios xinixrahobtesi, chan.
22 Quisukꞌi ut lix Noemí saꞌ lix tenamit rochben li ralib li quixcꞌam chak aran Moab. Queꞌel saꞌ li tenamit Moab ut queꞌcuulac aran Belén saꞌ xkꞌehil xtiquibanquil xsicꞌbal li cebada.